I Aneirin, Laura a Sisial
Mae fy llyfryn i’n fwy na dwrn o dudalennau
neu bluen gynnil yn cosi’r cloriau;
mwy na diadell o eiriau yng nghorlan y gân
neu’r lludw sydd gen i’n dystiolaeth o’r tân.
Mae’n un map mawr maith sy’n blygion i gyd
a’r papur yn breuo o’i gario cyhyd,
yn llyfr lle mae’r geiriau fel llwybrau mewn llên
a’r rheiny yn troelli â phob gwg a phob gwên,
lle cân Steve Eaves a Jimmy Cliff am yr heol arw a hir,
lle mae’r gorwel ynof mor rymus yn tywys dyhead trwy’r tir,
lle caf yn ymestyn rhwng nos a dydd
benrhynnau newydd yn Geltia o ffydd:
wrth beintio’r corneli tywyll â lliw
rwy’n sisial ymadroddion yn greadigaethau byw
ac felly’n fy llyfryn, rwy’n mynnu, rho nod
ar dudalen sy’n hawlio dy fod dithau yn bod.