Cerdd 'Mewn Dau Gae Pêl-droed' gan Osian Rhys Jones

Gweledigaeth Mewn Dau Gae Pêl-droed

Mae ‘Gweledigaeth Mewn Dau Gae Pêl-droed’ yn barodi ar gerdd enwog ac yn gerdd bêl-droed.

Gan ei bod hi’n Ddiwrnod Cenedlaethol Barddoniaeth, mae eraill yn ymgymryd â heriau gwirion fer Her 100 Cerdd Llenyddiaeth Cymru (faswn i byth yn gwneud y ffasiwn beth…).

Ond i mi, gan ei bod hi’n ddiwrnod cenedlaethol barddoniaeth a bod Cymru hefyd yn chwarae pêl-droed y dwthwn hwn  – mi rydw i am gyhoeddi cerdd o’r enw Gweledigaeth mewn Dau Gae Pêl-droed.

Nid oes angen i mi esbonio i’r rhai llengar yn eich plith mai parodi o fath ydi hon ar gerdd enwog Waldo Williams ‘Mewn Dau Gae’. Fe’i cyfansoddwyd ar ôl ymweliad byr â Pharis yn ystod pencampwriaethau Ewro 2016 eleni. Nid ydi’r gerdd hon am gyrraedd yr un uchelfannau ysbrydol â cherdd Waldo, ond gobeithio ei bod yn ddigon diffuant i roi ychydig o lwc i’r tîm cenedlaethol yn erbyn Awstria heno.

Gweledigaeth mewn dau gae pêl-droed

O ba le’r ymroliai’r bêl i Joe Ledley
Oedd ar ras dros Stade de Toulouse a Pharc des Princes?
Ar ôl i ni ganu’n groch ar y terasau tywyll,
O b’le y deuant, y gôls a fu erioed?
Neu pwy, pwy oedd y saethwr, yr asgellwr sydyn?
Gareth – arwr y maes oedd rholiwr y bêl.
Oddifry, uwchlaw’r dyfarnwr gloywbib, uwch callwib Hal Robson-Kanu,
Dygai i ni ein llwyfan mawr.

Sgoriai i ni’r goliau lle nad oedd
Ond trawstiau’n crynu ac atsain yn y cof,
Y brain digywilydd ar ystlysau’n crawcian,
Y Barry Horns yn breuddwydio mynd i’r ffeinals un haf.
Pwy sydd yn taclo pan fo’r difféns yn dihuno?
Cyfod, rhed, chwarae 1-2, wele’r ffans.
Pwy sydd yn ein safio ynghanol y goliau?
Yr oedd Wayne yn Stade de Toulouse a Pharc des Princes.

Am hyn y llafargana’r dorf yn y gwres a’u cwrw
A’r Ewros yn eu gwaed yn gyfandir o angerdd.
Mae’r llawenydd a feddant hwythau’n eu cenedl
Yn Stade de Toulouse a Pharc des Princes heb ofn.
A’u gafael ar y gwrthwynebwyr, y Ffanbarthau llawn pobl.
Diau y daw’r Gêm, a full-time yn ei dro,
Daw Joe Allen, daw Ramsey, daw Ben Davies i’r bwlch,
Daw’r Brenin Bale, a’r brain yn bolltio.

Leave a Comment

Your email address will not be published. Required fields are marked *